Не чаруй мяне, Швайцарыя! Не расчулены тым зманам. У душы маёй аварыя, Я ў настроі паламанам. I сумую ў падарожжы я, Абыякавы да краю. Дрэвы з выгляду прыгожыя — Тую штучнасьць сузіраю. Лес, як панскі шпiц, падстрыжаны. Едзеш — роўныя прасекі. Ні карчагі, ні камлыжыны, Ні крывой сасны-калекі. I старой ня бачу хаткі я. Проста домікі, як лялькі! А дарогі чыста гладкія, Як паверхня морскай галькі. Мне нявесела дарогаю, Край прычэсаны ня вабіць. I ў багацьці ёсьць убогае, Супярэчлівае, мабыць.
|
|